Иранскиот весник „Хамшахри“ објави контроверзна фотомонтажа со 13 западни и израелски лидери и функционери, кои ги претстави како лица што треба да ја очекуваат „одмаздата на иранскиот народ“.

На фотографијата американскиот претседател Доналд Трамп, израелскиот премиер Бенјамин Нетанјаху и другите функционери се прикажани во портокалова затворска облека. На челата на Трамп и Нетанјаху се поставени знаци што потсетуваат на мети.

Меѓу прикажаните се и италијанската премиерка Џорџа Мелони, францускиот претседател Емануел Макрон, германскиот канцелар Фридрих Мерц и британскиот премиер Кир Стармер.

На листата се најдоа и американскиот државен секретар Марко Рубио, секретарот за одбрана Пит Хегсет, командантот на Централната команда на САД Бред Купер и американскиот амбасадор во Израел Мајк Хакаби. Од израелска страна се наведени министерот за одбрана Израел Кац, началникот на Генералштабот Ејал Замир и министерот за надворешни работи Гидеон Саар.

Објавата следуваше откако новиот ирански врховен лидер Моџтаба Хамнеи повторно најави одмазда за смртта на неговиот татко Али Хамнеи, кој загина во американско-израелскиот напад на 28 февруари.

Хамнеи во писмена порака порача дека одмаздата е барање на иранскиот народ и дека, според него, таа мора да биде извршена. Тој наведе дека во тоа ќе учествуваат и „слободните луѓе ширум светот“.

„Хамшахри“ е весник поврзан со градските власти во Техеран и е познат по конзервативната и провокативна уредувачка политика. Засега нема потврда дека објавената листа претставува официјална одлука на иранската држава.

Посебно внимание во Италија предизвика вклучувањето на Џорџа Мелони, бидејќи Рим не учествува во воените напади врз Иран. Италијанскиот министер за надворешни работи Антонио Тајани ги оцени заканите како неприфатливи и порача дека Италија не војува против Техеран.

Италијанските служби ја анализираат објавата и нејзината можна поврзаност со иранските власти, додека Рим внимателно ги следи натамошните реакции од Техеран.