Американскиот претседател Доналд Трамп одржа состанок со тимот за национална безбедност за можен договор со Иран, но по двочасовната средба во Белата куќа не беше соопштена конечна одлука.

Трамп претходно најави дека во Кризната соба ќе се донесе „конечна одлука“ за предлогот што треба да го продолжи примирјето со Иран и да отвори простор за нови преговори. Според американските медиуми, на маса е можноста примирјето да се продолжи за уште 60 дена.

Белата куќа по состанокот излезе само со кратка порака дека претседателот ќе прифати договор единствено ако тој е во согласност со американските „црвени линии“. Главното барање на Вашингтон останува Иран никогаш да не дојде до нуклеарно оружје.

Во условите што ги наведе Трамп се вклучени и отворање на Ормутскиот Теснец за меѓународна пловидба, отстранување на морските мини и уништување на високо збогатениот ураниум. Reuters објави дека Трамп барал и укинување на американската блокада кон Иран, доколку се постигне договор.

Од Техеран, пак, стигна порака дека договор сè уште не е финализиран. Портпаролот на иранското Министерство за надворешни работи, Есмаил Багаи, изјави дека разговорите продолжуваат, но дека во оваа фаза фокусот е ставен на прекин на војната, а не на деталите околу нуклеарната програма.

Ормутскиот Теснец останува клучна точка во преговорите, бидејќи преку него во нормални услови минува значаен дел од светската нафта и гас. Предлогот што се разгледува предвидува Иран да ги отстрани мините од водниот пат, а САД постепено да ја ублажат блокадата и дел од санкциите.

Нов елемент во приказната е и изјавата на американскиот секретар за одбрана Пит Хегсет, кој порача дека САД се подготвени повторно да започнат напади врз Иран доколку не се постигне договор. Тој рече дека американската војска има доволно капацитети и резерви за таков чекор.

Засега, исходот останува неизвесен. Вашингтон тврди дека нема договор без исполнување на клучните услови, додека Техеран бара конкретни чекори од американска страна. По најавата за „конечна одлука“, молкот од Белата куќа само ја зголеми неизвесноста околу следниот потег на Трамп.