Американскиот претседател Доналд Трамп ги „торпедира“ преговорите за прекин на седумнеделната војна со Иран со своите јавни изјави за нивната содржина на социјалните медиуми и во интервјуа со медиумите, изјавија неколку негови советници за CNN.

Како што се приближуваше викендот, Вашингтон и Техеран изгледаа блиску до договор за прекин на конфликтот, но Трамп, во јавни настапи и објави на социјалните медиуми, рече дека Иран веќе се согласил на неколку клучни барања на САД, вклучително и предавање на своите залихи збогатен ураниум и широка суспензија на својата нуклеарна програма, рече изворот, објави CNN.

Иранските претставници брзо ги отфрлија тие тврдења и негираа дека се подготвува нова рунда разговори, што, според CNN, брзо „го изгасна оптимизмот за непосреден договор“.

Некои американски претставници приватно признаа дека јавните коментари на претседателот ги комплицираа преговорите, особено со оглед на длабоката недоверба на Техеран кон Вашингтон.

Дополнително на неизвесноста е наводната поделба во рамките на иранското раководство помеѓу преговарачкиот тим и Корпусот на Исламската револуционерна гарда, што го поставува прашањето кој на крајот би можел да го потпише потенцијалниот договор.

САД предложија 20-годишна пауза во збогатувањето на ураниум, додека Иран понуди пократки рокови, вклучувајќи пет или десетгодишна суспензија со ограничено збогатување подоцна.

Администрацијата на Трамп, исто така, ја разгледува можноста за одмрзнување на околу 20 милијарди долари ирански средства во замена за предавање на нивните залихи од високо збогатен ураниум.

Портпаролката на Белата куќа, Каролин Левит, изјави дека САД никогаш не биле поблиску до „добар договор“ со Иран, благодарение на она што таа го нарече „преговарачки вештини на претседателот Трамп“.

Нејасни планови за нова рунда разговори

Плановите за нова рунда разговори останаа нејасни, објави Си-Ен-Ен.

По конфузијата околу улогата на американскиот потпретседател Џ.Д. Венс во разговорите, американските претставници изјавија дека американска делегација би можела да отпатува во Исламабад во вторник, а разговорите веројатно ќе започнат во среда.

Во објава на социјалната мрежа Truth Social, Трамп рече дека операцијата „Полноќен чекан“ била „тотално уништување“ на нуклеарните постројки на Иран, обвинувајќи ги американските медиуми дека го потценуваат успехот на американските пилоти.

„Операцијата „Полноќен чекан“ беше целосно и тотално уништување на постројките за нуклеарна прашина во Иран. Затоа, ископувањето ќе биде долг и тежок процес. Лажните вести CNN и другите корумпирани медиумски мрежи и платформи не успеваат да им ја оддадат на нашите одлични пилоти заслужената заслуга - секогаш обидувајќи се да ги понижат и омаловажат - губитниците“, напиша Трамп.