Талибанците денеска објавија дека ја контролираат целата територија на Авганистан, пренесува агенцијата ТАСС, повикувајќи се на ТВ Ал-Арабија. Во изјавата на Талибанците што ја пренесе телевизијата се наведува дека нема тепачки во главниот град Кабул. Талибанската делегација преговара во претседателската палата во Кабул, каде денеска се очекува официјално предавање на власта, се наведува во извештајот на ТВ Ал-Арабија. Медиумите пренесуваат дека на аеродромот и болниците ќе им биде дозволено да продолжат со работа. На странците им беше кажано дека можат да заминат доколку сакаат или можат да останат и да го пријават својот престој кај Талибанците. 

Во извештајот на ТАСС, исто така, се наведува дека Ал Арабија објави дека претседателот на Авганистан, Ашраф Гани, ќе поднесе оставка во следните неколку часа.

Авганистанскиот министер за внатрешни работи Абдул Сатар изјави претходно дека предавањето на власта ќе биде мирно и дека талибанските единици нема да брзаат да го освојат главниот град.

Главниот град на Авганистан, Кабул, е последниот голем град што го држат владините сили, откако сите провинциски престолнини потпаднаа под офанзива на Талибанците. 

Талибанците, исламистичка милитантна група која окупираше големи делови на Авганистан, денеска почнаа да влегуваат во предградијата на Кабул.

Талибанските лидери велат дека во тек се преговори за пренесување на власта. Безбедносната состојба во главниот град е во рацете на авганистанската влада, пренесува Ал Џазира. Тие, исто така, издадоа уште една изјава, во која сакаат да ги уверат банките, трговците и другите претприемачи дека нивниот имот, пари и институции се безбедни и дека ќе можат да работат како и досега.