Шокираните училишни другарки и другари на 18-годишната Хана, ќерката на милијардерот Мајк Линч, која заедно со уште петмина се уште се водат за исчезнати по бродоломот на јахтата „Bayesian“Сицилија,  очајно чекаат вести.

Лондонското училиште Латимер во Хамерсмит изјави за Evening Standard: „Сите сме неверојатно шокирани кога слушнавме дека Хана и нејзиниот татко се меѓу исчезнатите во оваа трагична несреќа, а нашите мисли се со нивното семејство.

Талентираната тинејџерка требаше да студира англиски јазик на Универзитетот Оксфорд откако неодамна го заврши своето А-ниво, пренесува Тајмс.

Се верува дека Хана е помладата од двете ќерки на Мајк Линч.

Пријателите ја опишаа Хана како нежна, љубезна и смешна, како и жестока феминистка која сакаше да стане писателка.

Јахтата, која беше закотвена во текот на ноќта крај брегот на Палермо, Сицилија, беше зафатена од бура, вклучително и вртлива водена пијавица која го скина јарболот околу 5 часот наутро.

На јахтата имало 12 патници и 10 членови на екипажот, а таа потонала за само 60 секунди. Сега се стравува дека исчезнатите лица се заробени во кабините. Околу 11 преживеани беа спасени на мал гумен чамец за спасување, меѓу кои и мајката на Хана, Анѓела Бакареш (57).

Италијанските обвинители од блискиот град Термини Имерезе отворија истрага за несреќата, јавуваат локалните медиуми. Тие ќе се обидат да утврдат што предизвикало потонување на бродот и дали некој од екипажот е кривично одговорен.