Светската здравствена организација (СЗО) и другите хуманитарни групи денеска ги повикаа лидерите на 20-те најголеми светски економии да финансираат план од 23,4 милијарди долари за испорака на вакцини, тестови и лекови за коронавирус во сиромашните земји во следните 12 месеци.

Генералниот директор на СЗО, Тедрос Аданом Гебрејесус, изјави дека Групата 20, чии лидери ќе се состанат во Рим за време на викендот, има политичка и финансиска моќ да стави крај на пандемијата со финансирање на планот, за кој рече дека може да спаси милиони животи, пренесува Ројтерс.

На група од најголемите светски здравствени агенции (наречена ACT-акцелератор) им требаат 23,4 милијарди долари за да им помогнат на најзагрозените земји да набават и да доделат средства за борба против коронавирусот од сега до септември 2022 година, се вели во соопштението на СЗО. 

Тој износ се посочува дека е минимален во однос на илјадниците милијарди долари економски загуби предизвикани од пандемијата и трошоците за плановите за реконструкција.

- Побарувањето е за 23,4 милијарди долари. Тоа се многу пари, но ако ги споредите со штетата што пандемијата и ја нанесе на глобалната економија, тогаш тоа не е навистина толку голема, им рече на новинарите Карл Билт, поранешен шведски премиер и специјален пратеник на СЗО. 

„Се надевам и повикувам Г-20 да се посвети на ветувањето за ставање крај на пандемијата“, рече на прес-конференција норвешкиот премиер Јонас Гар Стјор, чија земја копретседава со кампањата за собирање средства.

foto: freepik.kom