Податоците од Универзитетот Џонс Хопкинс покажуваат дека во светот од корона вирусот се заразени повеќе од 13 милиони луѓе, а речиси 580 илјади се починати.

Повторното ширење на заразата со корона вирусот ги приморува властите во земјите да ги засилуваат рестриктивни мерки и да воведуваат контрола на границите. 

Уште во текот на вчерашниот ден, сите оние кои влегоа во Грција од Бугарија мораа да покажат негативен тест за Ковид-19 и тоа не постар од  72 часа.

Во Шпанија, властите во Каталонија се обидуваат да сузбијат ново жариште, а здравствените работници предупредуваат дека е потребно подобро и поголемо следење на контактите со заразените. Од вторникот на полноќ, 160 илјади жители на градот Љеида и околните подрачја можат да ги напуштат своите домови само со адекватно оправдување. Таа област е блокирана, а пред сите општини има полициски контролни пунктови. Баровите и рестораните работат само со испорака на храна.

Мерките и протоколите за безбедност пак се воведуваат и во Хонгконг, каде јавните собири се ограничени на четворица луѓе, на рестораните по 18 часот им е дозволена само достава на храна, а на една недела затоврени се и теретаните, баровите и другите бизниси. Во јавниот превоз за првпат е задолжително носењето на маски, а казна ќе има за оние кои нема да носат.

Ширењето на Ковид во Јапонија достигнал алармантно ниво , оценува градоначалнилката на Токио, Јурико Коике, која инситира граѓаните и компаниите да ги почитуваат превентивните мерки.