Светската економија ќе закрепнува годинава, очекува Светската банка. Позитивните резултати ќе се должат на растот кој ќе го забележат земјите во развој и веќе високо развиените земји и се плод на веќе надминатата криза која пет години го тресеше речиси целиот свет, се наведува во Извештајот за глобалните економски изгледи на Светска банка. „Економски раст ќе забележат и високоразвиените и земјите во развој, но ризиците и понатаму продолжуваат на глобално економско заздравување“, рече претседателот на работната група на Светска банка, Џим Јонг Ким. Во извештајот се прогнозира дека светскиот БДП годинава ќе порасне за 3,2% годинава, што е зголемување во однос на ланската година кога економскиот раст изнесуваше 2,4%. Следната 2015-та година, пак, Светската банка предвидува и дополнително зголемување - светскиот БДП ќе расте за 3,5% . Шансите за развој и ваквите позитивни трендови сепак остануваат исклучително чувствителни на претпоставките за зголемување на глобалните каматни стапки и потенцијалната нестабилност на капиталните текови.