Столтенберг остро го критикувал руското однесување во последната година „вклучувајќи ја и оружената интервенција во Украина“, и ветил дека Алијансата ќе ја удвои својата посветеност на „колективната одбрана“.

Генералниот секретар на НАТО истакнал дека летовите на руските стратегиски бомбардери се рашириле „од Јапонија до Гибралтарот, од Крит до Калифорнија, од Балтичко до Црно Море“.

„Кога станува збор за прашање за нуклеарното оружје внимателноста, предвидливоста и транспарентноста се од витално значење“, истакнал Столтенберг, според кој руското „тропање со нуклеарната сабја е неоправдано, дестабилизирачко и опасно“.

Столтенберг исто така ја критикува Русија и поради изведувањето на ненадејни воени вежби, што претставува кршење на меѓународните договори со кои од владата се бара да ги споделува информации за планираните вежби и на нив да се поканат странски набљудувачи.

Русија во близина на границата со Украина токму оваа недела одржува уште една таква вежба во која учествуваат над 250 авиони и 700 парчиња тешко оружје.

Наведувајќи го примерот на наводните руски акции во Украина, Столтенберг заклучил дека Русија „ја демонстрира својата воена сила, поттикнува агресивен национализам и го истакнува правото на наметнување на својата волја врз соседите и одземање територија“.