Британскиот премиер Кир Стармер се соочува со сериозен внатрепартиски притисок, откако дел од министрите и пратениците од Лабуристичката партија побарале да се разгледа можноста за негово повлекување од функцијата, јавуваат британски медиуми.

Според објавите, министерката за внатрешни работи Шабана Махмуд во приватни разговори наводно повикала на „уреден транзициски процес“, додека околу 75 лабуристички пратеници сметале дека Стармер треба да ја напушти премиерската функција по слабите резултати на локалните избори.

Дополнителен притисок врз британскиот премиер создадоа и оставките на четворица владини помошници, кои како причина го навеле губењето доверба во неговото лидерство. Дел од функционерите предупредуваат дека авторитетот на Стармер е сериозно нарушен и бараат да биде утврден јасен рок за негово евентуално заминување од „Даунинг стрит 10“.

Во таква атмосфера, за денеска е закажана итна седница на Кабинетот, на која се очекува министрите да разговараат за идните чекори. Според британски извори, меѓу членовите на Владата има различни ставови околу тоа дали кризата треба да се решава со промени во лидерството или со обид премиерот да ја стабилизира политичката ситуација.

Министерот за одбрана Џон Хили, според извори блиски до Владата, повикал на внимателен пристап и на избегнување хаотичен процес, посочувајќи дека земјата се соочува со сериозни геополитички и економски ризици.

Заменик-министерот за здравство Стивен Кинок изјавил дека е можно дел од министрите на седницата да побараат оставка од премиерот, но предупредил дека таков потег би можел да предизвика дополнителна политичка нестабилност.

Стармер претходно порача дека нема намера да се повлече и дека ќе покаже оти неговите критичари грешат. Сепак, притисокот во партијата продолжува да расте, особено по изборните резултати на Лабуристичката партија.

Поранешната министерка Кетрин Вест најавила иницијатива за забрзување на рокот за евентуална оставка на Стармер до септември. Според британските медиуми, таквата иницијатива ја поддржале околу 80 пратеници.

Лабуристите на локалните избори изгубија околу 1.500 советнички места, забележаа пад на поддршката во Шкотска, а во Велс завршија на третото место. Токму овие резултати ја отворија најсериозната лидерска криза за Стармер од почетокот на неговиот мандат.

Во обид да го намали незадоволството, премиерот во говор во Лондон изјави дека ја презема одговорноста за резултатите, но дека ќе продолжи со работа. Тој ја опиша актуелната политичка состојба како „битка за душата“ на Обединетото Кралство и најави реформи во системот на практикантства, со цел поголема поддршка за малите бизниси и за младите.

Дел од лабуристичките пратеници јавно застанаа зад Стармер, оценувајќи дека премиерот ја разбира тежината на предизвиците со кои се соочува земјата.

Во меѓувреме, британските медиуми шпекулираат за можни наследници на Стармер. Меѓу имињата што се споменуваат се министерот за здравство Вес Стритинг, градоначалникот на Манчестер Енди Бурнам и поранешната заменик-премиерка Анџела Рејнер.

Стритинг, кој се споменува како можен иден лидер, ги отфрла таквите амбиции, а според медиумските извештаи досега немал разговор со Стармер за актуелната ситуација. Оставките на парламентарни помошници блиски до него дополнително ги засилија шпекулациите дека би можел да се вклучи во евентуална лидерска трка.

Бурнам, пак, би морал повторно да стане пратеник преку дополнителни избори пред да може формално да влезе во трка за премиерската функција. Неговите поддржувачи изразуваат загриженост дека пребрзо организирање лидерски избори би можело дополнително да ја подели партијата.

Рејнер повика на смирување на внатрешните поделби во Лабуристичката партија. Во обраќање пред Синдикатот на вработените во комуникацискиот сектор, таа порача дека партијата мора да го стави заедничкиот интерес пред фракциските пресметки.

„Како партија мора да бидеме подобри од ова и можеме да докажеме дека навистина стоиме зад нашите лабуристички вредности само ако го ставиме општиот интерес пред фракциските поделби“, изјави Рејнер.