Стапката на невработеност во еврозоната ќе достигне нов рекорд од 12,3 проценти на крајот на 2014 година, а младите луѓе и натаму ќе бидат најпогодени од немањето работни места, се наведува во извештајот на Организацијата за економска соработка и развој ( ОЕЦД).

Во документот се истакнуваат големите разлики меѓу членките на еврозоната, кои одат до крајности. Додека Грција и Шпанија имаат 28 отсто невработеност, во Германија едвај 5 проценти од работоспособното население е регистрирано како невработено.

Организацијата за економска соработка и развој до крајот на 2014 година очекува невработеноста во САД да падне под 7 проценти.

Генерално, просечната стапка на невработеност меѓу 34-те држави на ОЕЦД, во кои се најбогатите земји во светот, малку ќе се намали во следните 18 месеци, паѓајќи од 8 отсто во мај 2013 на 7,8 отсто на крајот во 2014 година.

Во моментов 48 милиони жители на земјите од ОЕЦД се без работа, што е за 16 милиони повеќе во споредба со 2007 година.