Од денеска влезе во сила законот со кој се дозволува амнестирање за учесниците во протестните безредија во Украина, доколку во следните 15 дена демонстрантите исполнат три услови. Од демонстрантите се очекува да ги ослободат сите заземени, за време на протестите, згради на органите на државната власт и локалната самоуправа и да не го попречуваат нивното натамошно функционирање. Учесниците во протестот треба да ја отстранат блокадата на улицата „Грушевски“ во Киев, со цел сообраќајот во градот да се нормализира. Третиот услов е да се отстранат блокадите од улиците, плоштадите и крстосниците насекаде во Украина, освен на местата каде се спроведуваат мирни протестни активности.