Од вкупно осум жртви на последното снежно невреме во САД, најмалку половината починале чистејќи го снегот пред нивните домови. Секоја година стотина Американци умираат чистејќи снег, а и во Канада ова е честа причина за смрт. Зошто? Кардиологот Бери Френклин вели дека бројот на луѓе кои умираат чистејќи снег секоја година би можел да биде и двојно поголем, но прецизна статистика за сега нема. „Верувам дека заради таа активност годишно губиме стотици животи“, вели Френклин, директор за превентивна кардиологија и кардио-рехабилитација во болницата „Вилијам Бомонт“ во Мичиген. Податоците покажуваат дека на младите луѓе повеќе им се зголемува пулсот и крвниот притисок додека чистат снег отколку додека, на пример, трчаат по подвижна лента. „Кога тоа ќе се комбинира со студениот воздух кој ги стега крвните садови и го намалува протокот на крв, имате ’совршени’ предуслови за срцев удар“, објаснува Френклин. Чистењето на снегот е особено напорно бидејќи бара работа на рацете, што е потешко отколку работата со нозе, а исправената положба притоа ја пренасочува крвта од срцето кон долните екстремитети. Влажниот и тежок снег значи и дополнително напрегање. Многу луѓе при тешка работа го задржуваат дишењето, што уште повеќе го оптоварува телото. За да биде ситуацијата полоша, чистењето на снегот најчесто се изведува меѓу 6 и 10 часот наутро, кога луѓето природно се ранливи на срцев удар. Докторот Френклин заради тоа смета дека чистењето на снегот е толку опасно што воопшто не е препорачливо за лица постари од 55 години! Ако веќе мора, подобро е снегот да се турка отколку да се крева, треба слоевито да се облечете, да правите редовни паузи на топло и да не јадете и пиете пред да се зафатите со оваа активност, советува тој. „Луѓето всушност немаат поим колку чистењето на снегот го оптоварува срцето“, предупредува Френклин.