Украинскиот министер за надворешни работи Андриј Сибиха објави мапа на социјалните мрежи на која се гледа рутата на беспилотното летало кое влегло во украинскиот воздушен простор од Унгарија.

„За слепите унгарски службеници. Точната рута на упадот со беспилотно летало. Нашите вооружени сили ги собраа сите докази и сè уште чекаме објаснување од Будимпешта што правел овој објект над Украина“, рече Сибиха.

Неговото соопштение доаѓа откако унгарскиот министер за надворешни работи, Петер Сијарто, напиша на Фејсбук дека претседателот Володимир Зеленски „почнува да го губи разумот“ поради, како што тврди, антиунгарските ставови.

„Сега гледа чудовишта“, напиша Сијарто, реагирајќи на тврдењето на Володимир Зеленски дека извидувачките беспилотни летала од Унгарија го нарушиле украинскиот воздушен простор и веројатно го испитувале индустрискиот потенцијал на пограничните области.