Белата куќа соопшти дека официјалниот профил на американскиот претседател, Барак Обама на „Твитер" - @POTUS (од President of the United States - претседател на САД), ќе биде наследен од неговиот наследник на функцијата. 

Следниот претседател на САД ќе почне со огромен број следбеници - 11,1 милиони, но со чисто поле за пораки. Обама ќе добие нов профил.

Истото ќе биде направено со профилите на „Фејсбук" и „Инстаграм", како и со други профили на „Твитер", вклучувајќи го и оној на првата дама Мишел Обама @FLOTUS (First Lady of the United States - прва дама на САД) и на потпретседателот, Џо Бајден.

Од Белата куќа велат дека снимките  со времетраење од илјадници часови и милионите слики од профилите се пренесуваат во дигитален архив.

Обама ќе ја напушти функцијата со многу поголем обем од дигитални содржини за архивирање од кој и да било претседател на САД пред него.