Шеесет постари жени вработени во Министерството за одбрана на Обединетото Кралство укажаа на „непријателска и токсична атмосфера“ во нивниот оддел, во писмото во кое детално се опишани бројните сексуални напади, вознемирувања и злоупотреба од машките колеги.

Писмото, видено од новинарите на Гардијан, беше испратено од голема група високи државни службеници до секретарот на Министерството за одбрана минатиот месец, заедно со анонимни сведоштва во кои жените ги опишаа личните искуства, пренесува „Euronews“.

Извештаите вклучуваат тврдења дека машките колеги во Министерството за одбрана постојано се однесувале непријателски кон жените на работното место, објави Гардијан.

Група „постари цивилни жени“ во тоа писмо наведува дека „нивниот секојдневен професионален живот е попречен од однесувања кои би се сметале за токсични и несоодветни во јавниот живот, но се толерираат во Министерството за одбрана“.

„За нас се зборува за време на состаноци, подложни на пејоративен јазик, добиваме несакано внимание и се соочуваме со сексуално вознемирување, вклучително наметливо зјапање, сексуализирани коментари, како и коментари за тоа што носиме, како изгледаме и како мирисаме“, велат од групата.

Сведочењето вклучуваше список на наводни инциденти во седиштето на Министерството за одбрана во Лондон и во прекуокеанските бази.

Извештаите, од кои повеќето се опишани како многу неодамнешни, сугерираат дека постои навредлива и дискриминаторска култура на работното место во еден од најголемите владини оддели во Обединетото кралство.

Фото: EPA-EFE/NEIL HALL