Во пресрет на клучниот самит меѓу американскиот претседател Доналд Трамп и рускиот лидер Владимир Путин, граѓаните на Киев имаат поделени очекувања – од голема надеж за мир до длабок скептицизам, јавува CNN.

„Се надевам на најдоброто. Сакам да се вратам во мирен Киев и да продолжам да живеам безбедно. Искрено верувам дека светските лидери ќе обрнат внимание на Украина, па имам големи надежи“, вели Олександра. 

Марја, пак, со тага зборува за состојбата на фронтот.

„Сакам мир и тишина – тоа е најважно. Но, гранатираат цели сиромашни области на првата линија. Толку луѓе умираат за ништо, за ништо“, вели таа. 

Слично размислува и Оксана, која од самитот очекува само „празни ветувања“. 

„По неколку дена, нападите ќе продолжат како и обично. Искрено, ништо не очекувам“, кажа Оксана. 

Катерина нагласува дека приоритет е запирање на убивањата, „но под услови што се прифатливи за Украина и украинскиот народ“.

„Ништо не очекувам. Прво, затоа што ставот на Трамп се менува побрзо од тоа што тој може да го изговори. Второ, Путин треба да им покаже на своите граѓани дека може сè, дека знае сè и дека може да го надмудри секого. И секако, не мислам дека ќе се откажеме од нашите територии“, додава Костјантин. 

Војната трае веќе три и пол години.