Швајцарските банки се спремни на американското Министерство за правда да му откријат како им помагале на клиентите да ги сокријат парите и да избегнат плаќање на данок, пишува Блумберг.

Оваа година е потпишан договор меѓу  американското Министерство за правда и 41 швајцарска банка, со кој банките се обврзале дека ќе откријат како на клиентите им помагале во криење на пари, кои се одговорни банкари, посредници, како и како се движеле тековите на парите.

Тие информации ќе им помогнат на американските истражувачи да покренат истрага против лица и институции кои биле вклучени во перење на пари и тоа во други земји, а потенцијални мети се банки во Израел и Сингапур.

„Парите од Швајцарија одат во разни други земји“, изјавила американската истражителка Каролина Чираоло.

Првата соработка на американското правосудство со швајцарските банки започна во 2009 година, откако УБС , во рамки на нагодбите плати казна од 782 милиони долари поради помагање во избегнување на данок, а тогаш е покрената и истрага против уште 14 банки.