Украинскиот претседател Володимир Зеленски го примил нацртот на новиот американски мировен план за Украина и ќе разговара со американскиот колега Доналд Трамп во следните денови, соопштија од кабинетот на украинскиот претседател.

Добро упатени извори претходно изјавија за „Ројтерс“ дека САД му најавиле на Зеленски дека Украина мора да прифати американска нацрт-рамка за крај на војната со Русија, според која Киев мора да предаде територија и некои оружја. Украински функционери го отфрлија планот како апсурден и неприфатлив, велејќи дека бил подготвен од блискиот соработник на Владимир Путин, Кирил Дмитриев и од специјалниот пратеник на Трамп, Стив Виктоф.

И Европската Унија кажа дека се противи на планот од 28 точки, кој вклучува услови што би биле многу неповолни за Украина, како целосно предавање на Донбас и ограничувања на вооружените сили.

„Подготвени сме сега, како и досега, конструктивно да соработуваме со американската страна, како и со нашите партнери во Европа и низ целиот свет, со цел резултатот да биде мир. Разговорите на Зеленски со Трамп ќе вклучуваат дискусија за клучните точки потребни за постигнување мир“, се вели во соопштението на кабинетот на Зеленски.

Според Москва, консултациите во моментов не се во тек. 

„Секако, има контакти, но нема процес што би можел да се нарече консултации“, рече портпаролот на Кремљ, Дмитри Песков.

Тој рече дека Русија нема што да додаде освен ставот што рускиот претседател Владимир Путин го изнесе на самитот со Трамп во август, а тоа е дека секој мировен договор мора да ги реши суштинските причини за конфликтот. Руската инвазија на Украина почна на 24 февруари во 2022 година. 

фото Фејсбук/Володимир Зеленски