Двете жени кои во февруари го убија Ким Џонг-Нам, полубратот на севернокорејскиот лидер Ким Џонг-Ун, денеска се однесени на аеродромот во малезискиот главен град Куала Лумпур, каде се изврши убиството. 

Ова е  во рамки на полициската истрага за инцидентот.

Сити Аишја (25) од Индонезија и Доан Ти Хуонг (28) од Виетнам го испрскаа Ким Џонг-Нам со нервен отров, по што тој почина. Двете жени велат дека се измамени, и дека мислеле дека учествуваат во шега, односно дека ќе го испрскаат патникот со обична вода.

Жените биле облечени со заштитни елеци и сместени во колички со кои ги возеле низ аеродромот. Во рамки на истрагата тие се однесени до аеродромскиот ресторан, каде Сити Аишја се сретнала со неидентификуван човек, како и до тоалетите каде се случил самиот напад. 

Полицијата на Малезија и безбедносните служби од повеќе источно-азиски држави се сомневаат дека тајната служба на Северна Кореја го организирала атентатот, стравувајќи дека Ким Џонг-Нам може да биде искористен за создавање поделби во владејачката династија во Северна Кореја.