Доналд Трамп, претседателот на САД, во вчерашното обраќање во Давос, го спомена и својот план за изградба на „Златната купола“ на Гренланд.

Патем, откако се врати на функцијата, Трамп ја промовира својата амбиција да изгради систем за ракетна одбрана под тоа име. Предлогот вклучува мрежа од потенцијално стотици сателити и копнени системи за откривање, следење и пресретнување на дојдовни ракети.

„Сè што сакаме од Данска е таа земја, на која ќе ја изградиме „Златната купола“. Тие исто така ќе ја заштитат Канада, што е неблагодарно. Она што го направивме за Израел е исклучително. Ќе го сториме истото за САД и за целиот свет“, рече вчера Трамп.

Како дел од неговата обновена кампања за преземање на Гренланд, Трамп се закани дека ќе воведе царини за осум европски земји или дури ќе употреби сила за да ја преземе територијата.

Сепак, тој одеднаш се откажа од тие планови и наместо тоа објави дека е во подготовка договор што ќе ја задоволи неговата желба за систем за ракетна одбрана во Гренланд и пристап до критични минерали. Деталите засега се оскудни, но за време на говорот на Светскиот економски форум во Давос неколку часа претходно, Трамп продолжи да тврди дека САД мора да ја преземат „сопственоста“ на арктичкиот остров за да го одбранат.

Системот „Златна купола“ е, барем делумно, инспириран од израелската „Железна купола“, која од 2011 година обезбедува копнена заштита од ракети и проектили.

Замислено е „Златна купола“ да има и копнени и вселенски капацитети што можат да идентификуваат и пресретнат ракети во четирите главни фази од потенцијален напад. Малколм Дејвис, виш аналитичар за одбранбени капацитети во Австралискиот институт за стратешка политика (ASPI), рече дека „Златна купола“ е дизајнирана да обезбеди што е можно „непробојна“ ракетна одбрана.

„Против балистички ракети со нуклеарни врвови и хиперсонично оружје што би можеле да го лансираат американските противници - како што се Русија, Кина, Северна Кореја“, изјави тој за ABC.

Целосно непробојна одбрана е „практично невозможна“, но системот би можел да ги намали шансите нуклеарните боеви глави да стигнат до САД, додаде тој. Трамп рече дека издвоил 175 милијарди американски долари за програмата и дека неговата цел е системот да биде оперативен до крајот на неговиот мандат.

Сепак, некои експерти веруваат дека и цената и временската рамка се нереални.

Тод Харисон од Американскиот институт за претприемништво проценува дека системот би можел да чини околу 1 милијарда долари во текот на 20 години, а дури 3,6 милијарди долари за целосно функционален ракетен штит.

Во извештајот на Центарот за контрола на оружјето и неширење на нуклеарно оружје од јуни минатата година, се наведува дека програмата е сè уште во концептуална фаза.

Сепак, Конгресот на САД веќе почна да издвојува средства за истражувања, студии и класифицирани развојни проекти.

foto printskrin youtube