Шпанската влада ја оспори пред Уставниот суд на земјата резолуцијата за одвојување на Каталонија усвоена од парламентот на покраината.

Премиерот Маријано Рахој, цитиран од „Франс прес“, изјавил на прес-конференција дека владините адвокати бараат од судот „веднаш да ја суспендира резолуцијата и сите последици од неа“. Активностите се преземени по итна средба на кабинетот денес.

Во понеделникот, 9 ноември, парламентот на Каталонија ја одобри резолуцијата за независноста на ентитетот. „За“ гласаа 72 пратеници, 63 беа „против“.

Документот прогласува „почетокот на процесот за создавање на независна држава Каталонија во форма на република“. Предвидено е во текот на 18 дена да бидат формирани различни државни структури, а исто така да биде подготвен и уставот.