Шпанскиот министер за транспорт Оскар Пуенте денес изјави дека железничката несреќа во Адамуз во близина на Кордоба, во која загинаа најмалку 39 лица, а 152 беа повредени, била „исклучително чудна“.

Пуенте разговараше со новинарите на железничката станица Аточа во Мадрид рано утрово за да даде информации за околностите на излетувањето на возот од шините, велејќи дека несреќата била „чудна, многу чудна и многу тешка за објаснување во овој момент“, објави дневниот весник Паис.

Според министерот Пуенте, сите железнички експерти со кои разговарал во неделата вечерта „се многу збунети“ од несреќата.

Тој потсети дека пругата каде што се случила несреќата била реновирана минатата пролет и дека возот Ирио „бил практично нов, стар помалку од четири години“.

Пуенте објави дека независна комисија ќе биде задолжена да го истражи инцидентот за да разјасни што се случило.

„Во овој момент, не можеме ни да шпекулираме дали станува збор за подвижниот состав или за пругата. Не знаеме“, нагласи Пуенте, повторувајќи дека „навистина е чудно што се случило“ со оглед на сите околности.

„Пругите беа сменети на целосно реновирана пруга во која беа инвестирани 700 милиони евра. Поточно, замената на прекинувачите и држачите на таа делница беше завршена во мај 2025 година. Затоа оваа несреќа е многу чудна. Се случи на делница што е целосно права, без кривини. Се надеваме дека истрагата ќе ни помогне да разјасниме што се случило“, рече Пуенте.

Како што претходо објавивме, најмалку 39 лица загинале, а 152 биле повредени во несреќата во Адамуз во близина на Кордоба.