Зголемен број цивили сега се подготвени да се евакуираат од регионот Доњецк кој е под контрола на Украина, изјави високиот регионален функционер, пренесува Си-Ен-Ен.

- Луѓето кои не се обидоа и не сакаа да си заминат на почетокот кога беше побезбедно, заминуваат сега. Ги евакуираме и од населбите на фронтот и од градовите Бахмут, Соледар и Славјанск. Сега темпото е зголемено - изјави на украинската телевизија Павло Кириленко, шеф на регионалната воена управа на Доњецк.

Борбите во источните региони Доњецк и Луганск се интензивираа во последниве недели, со засилени руски напади врз градот Славјанск и интензивна урбана битка за Северодонецк, најисточниот град контролиран од украинската влада.

Екипа на Си-Ен-Ен во источна Украина во понеделникот виде долги редици цивилни автомобили кои возат на запад од делот на регионот Доњецк кој е под контрола на Украина.

Кириленко посочл дека евакуациите биле „исклучително опасни“.

- Секој ден ги евакуираме луѓето, дури и од линијата на фронтот. Ова е многу потешко да се направи под или помеѓу гранатирање, бидејќи движењето на автобус за евакуација или мал автомобил не значи дека окупаторите нема да пукаат во него - рече тој.

Тој рече дека линијата на фронтот во регионот Доњецк „остана непроменета во текот на изминатиот ден“ и дека „речиси секој ден имаме цивилни жртви“.

Фото: EPA/ ALESSANDRO GUERRA