Уште еден републикански сенатор го брани украинскиот претседател Володимир Зеленски, кого американскиот претседател Доналд Трамп го нарече диктатор. 

Познатиот републикански сенатор и долгогодишен сојузник на Трамп, Линдзи Греам, изјави дека се согласува со американскиот претседател дека Украина треба да одржи избори, но инсистира дека тие не треба да се одржат пред да се договори прекин на огнот со Русија.

Во изминатите 24 часа, Трамп го нарече својот украински колега диктатор и „ужасен лидер“, сугерирајќи дека Украина треба да одржи избори за време на војната.

Греам рече дека разговарал со Зеленски и не се согласува со критиките на Трамп кон украинскиот лидер.

„Знаете, Путин е вистински диктатор. Она што треба да направите е да најдете заклучок за војната што нема да доведе до трета инвазија. Нема да има договор без консултација со Украина, бидејќи тоа нема да функционира. Разговарав со Зеленски денеска. Никој нема да направи нешто во што вие не сте вклучени“, рече Греам, мислејќи на Украинците.

Инаку, двајца истакнати републикански сенатори, сенаторот Роџер Викер од Мисисипи и сенаторот Џон Кенеди од Луизијана, го критикуваа Путин и се чини дека се разидоа со претседателот Доналд Трамп во врска со преговорите за  ставање крај на војната во Украина. Викер, кој е и претседавач на Комитетот за вооружените сили во Сенатот, порача дека Путин треба да биде осуден, па и егзекутиран.

Руската инвазија на Украина почна на 24 февруари во 2022 година.