Украинскиот претседател Володимир Зеленски на Телеграм денеска напиша дека ќе го заштитат она што е нивно.

Се навршија пет месеци откако Русија ја почна инвазијата врз Украина на 24 февруари.

„Ќе победиме. Војната не ја скрши Украина и нема да ја скрши“, додаде тој.

Зеленски ги повтори повиците до меѓународната заедница да го обезбеди оружјето што ѝ е потребно на Украина за да го одбие рускиот напад и да ја ослободи украинската територија што е окупирана од Москва. Зеленски истакна дека војната во последните пет месеци е продолжение на првичниот напад на Русија врз неговата земја пред осум години, кога Москва го анектираше украинскиот црноморски регион Крим и поттикна сепаратистички конфликт во делови од источна Украина.

Последна на удар беше Одеса, а Русија се правда дека уништила оружје. 

Досега има илјадници убиени, и милиони раселени. Украинските власти соопштија дека бројка за тоа колку жртви има ќе објават по завршување на војната.