Жителите на Иран велат дека се целосно исцрпени и едвај спијат по 11 дена интензивни американско-израелски напади, додека експлозии речиси постојано одекнуваат во Техеран и во блискиот град Караџ. Дополнителен проблем се честите прекини на електричната енергија, кои уште повеќе го отежнуваат секојдневниот живот.

Во разговори за BBC Persian, многумина опишуваат ноќи исполнети со детонации, сирени и темнина поради прекини на струјата.

„Синоќа бев во целосен мрак. Немаше струја и немав поим што се случува“, изјавил жител на Техеран.

Друг жител на главниот град вели дека ракети погодиле улица во близина на неговиот дом.

„Се чувствувам ужасно. Денеска погодија улица блиску до нас. Само сакам вечерва да заспијам“, рекол тој.

Еден млад жител на Техеран додава дека засега се живи, но дека проектилите секој ден паѓаат сè поблиску до нивните домови.

Израелската армија во понеделник вечерта соопшти дека започнала „бран напади врз терористички цели во Техеран“. Според соопштението, меѓу целите бил подземен комплекс што го користи Револуционерната гарда за истражување на оружје, инфраструктура поврзана со елитната единица Кудс, како и други објекти поврзани со воената индустрија.

Во вторник попладне бил започнат нов бран напади врз иранската престолнина.

Војната започна на 28 февруари, кога САД и Израел извршија заеднички удари врз цели во Иран, по што Техеран возврати со ракети и дронови кон Израел, како и кон цели во земјите од Блискиот Исток каде се наоѓаат американски воени бази.

Голем број цивилни жртви

Организацијата Human Rights Activists in Iran (HRANA) со седиште во САД соопшти дека од почетокот на конфликтот во Иран загинале 1.761 лице, меѓу кои најмалку 1.245 цивили, вклучително и 194 деца.

Поради ограничениот пристап на странските новинари и речиси целосното ограничување на интернетот во земјата, овие податоци не можат независно да се потврдат.

Сепак, според сведоштвата на жителите со кои контактирал BBC Persian, експлозиите во текот на ноќта траеле речиси без прекин.

„Во еден момент детонациите траеја дваесетина минути без пауза. Уморен сум. Сè што го сочинуваше мојот секојдневен живот исчезна“, рекол еден жител на Техеран.

Жителите исто така наведуваат дека во повеќе делови од градот се регистрирани краткотрајни прекини на електричната енергија, што дополнително го отежнува животот во услови на постојани напади.