Американската војска објави видео за кое тврди дека покажува напад врз брод за кој вели дека е вклучен во нелегален шверц со дрога во Карибите. Јужната команда на САД соопшти дека нападот се случил на 10 ноември.

Објавеното видео покажува како бродот се движи со голема брзина и одеднаш се запалува.

Во четврток, функционер на Пентагон изјави за Ројтерс дека САД го извршиле својот 20-ти напад врз брод за кој се тврди дека се занимавал со трговија со дрога.

„Нападот се случил во Карибите и четворица наркотерористи биле убиени, нема преживеани“, рече функционерот.

Во американските напади врз бродови за кои се сомнева дека шверцуваат дрога на Карибите и на пацифичкиот брег на Латинска Америка се убиени десетици луѓе, кои администрацијата на претседателот Доналд Трамп ги нарекува терористи кои продаваат наркотици.