Американскиот Стејт департмент издаде ново безбедносно предупредување, со кое ги повикува сите американски државјани ширум светот, а особено оние на Блискиот Исток, да бидат дополнително внимателни.

Во соопштението се наведува дека граѓаните треба строго да ги следат безбедносните насоки и известувања што ги издаваат најблиските американски амбасади и конзулати. Дополнително, предупредуваат дека можни се повремени затворања на воздушниот простор, што може да предизвика нарушувања во патувањата.

Стејт департментот истакнува дека американските дипломатски објекти, не само на Блискиот Исток, туку и во други делови од светот, веќе биле цел на напади. Постојат и зголемени ризици дека групи кои го поддржуваат Иран би можеле да таргетираат американски интереси или локации поврзани со САД и нивните граѓани во странство.

Американските власти ги повикуваат своите државјани да се регистрираат во системот STEP (Smart Traveler Enrollment Program), преку кој можат да добиваат најнови безбедносни информации и предупредувања.

Исто така, се препорачува внимателно планирање на патувањата, со проверка на официјалните патни совети и актуелни информации за конкретната дестинација.

Ова предупредување доаѓа во услови на зголемени геополитички тензии и безбедносни ризици на глобално ниво.