САД се закануваат дека ќе се повлечат од Меѓународната агенција за енергетика (IEA) ако не се повлечат останатите членки од зелената транзиција.

Министерот за енергетика на САД, Крис Рајт, во вторникот се закани дека ќе ги повлече САД од Меѓународната агенција за енергетика (IEA), чија работа за обновлива енергија е во спротивност со политиките на администрацијата на Доналд Трамп кои се залагаат за фосилни горива.

„Ако голем дел од агенциите за известување за податоци се посветени на вакви левичарски фантазии, тоа би можело да ја наруши нивната мисија“, рече Рајт на конференција во Францускиот институт за меѓународни односи во Париз, објави Политико.

Обвинувајќи ја IEA дека се однесува како „организација за застапување на климата“, Рајт повика таа да се фокусира на енергетската безбедност.

Основана во 1974 година по првата нафтена криза, IEA со седиште во Париз развива сценарија за транзиција кон обновливи горива кои поставуваат стандарди за енергетскиот сектор. Рајт ќе присуствува на министерскиот состанок на агенцијата во Париз во среда и четврток.

Откако претседателот Доналд Трамп се врати во Белата куќа во јануари 2025 година, залагајќи се за употреба на фосилни горива и укинување на зелените регулативи, меѓународната агенција е под критики од неговата администрација, која врши притисок врз раководството на ИЕА да се откаже од својата работа во енергетската транзиција.

Во својот последен годишен извештај во ноември, ИЕА делумно се согласи со тие барања, повторно воведувајќи сценарио засновано на моменталните трендови.

Ова не е прв пат Рајт да ја предупреди агенцијата за нејзината работа.

„Ќе го промениме начинот на кој работи ИЕА или ќе се повлечеме“, рече тој во интервју за Блумберг минатиот јули.