Администрацијата на американскиот претседател Доналд Трамп дозволи да истече изземањето од санкциите кое им овозможуваше на одредени земји, меѓу кои и Индија, да купуваат руска нафта што се транспортира по морски пат. Со тоа, САД практично повторно ги вратија ограничувањата за купување руска сурова нафта и нафтени деривати.

Изземањето беше продолжено за еден месец со цел да се ублажат недостигот на нафта и високите цени, предизвикани од затворањето на Ормускиот Теснец од страна на Иран. Но, последната дозвола истече на 16 мај 2026 година, а Министерството за финансии на САД не објави ново продолжување.

Според Reuters, дозволата важела за руска нафта и нафтени производи кои веќе биле натоварени на танкери. Таа овозможувала трансакции поврзани со продажба, транспорт и истовар на тие количини, како и услуги неопходни за безбедно пристанување, поправки, осигурување и управување со бродовите.

Американскиот секретар за финансии Скот Бесент претходно најави дека дозволата нема да биде продолжена. До саботата попладне по вашингтонско време, на веб-страницата на Министерството за финансии не беше објавено ново известување за продолжување, а портпаролот на Министерството одби дополнителен коментар.

Двајца демократски сенатори, Џин Шахин и Елизабет Ворен, претходно ја повикаа администрацијата да не го продолжува изземањето, оценувајќи дека со тоа ѝ се обезбедуваат приходи на Русија за финансирање на војната во Украина, без докази дека мерката реално ги намалила цените на горивото за американските потрошувачи.

Одлуката може да има последици за глобалниот пазар на нафта, особено за земји што во последниот период значително купуваа руска нафта. Според украински медиуми кои се повикуваат на американската Канцеларија за контрола на странски средства, испораките на руска нафта за Индија во мај достигнале рекордни 2,3 милиони барели дневно, а до крајот на месецот би можеле да останат на околу 1,9 милиони барели дневно