Соединетите Американски Држави(САД)  вршат силен притисок врз Украина да ги повлече своите воени сили од регионот Донецк, дел од кој Киев сè уште контролира.

Доколку нема напредок во преговорите, Вашингтон би можел да се повлече од процесот и да се фокусира на воените операции во Иран, објавува „Украинска правда“, повикувајќи се на извори блиски до преговорите.

Преговарачите на САД и Украина се состанаа во саботата во Флорида во обид да ги оживеат застојаните разговори за прекин на четиригодишната војна во Украина. Преговорите со посредство на САД се заглавени откако американските и израелските сили почнаа напади врз Иран кон крајот на февруари. Последниот состанок на руските и украинските преговарачи се одржа во февруари во Женева.

„Американците веруваат дека не е можно да се постигне договор за клучно прашање“, изјави неименуван член на тимот на украинскиот претседател Володимир Зеленски, кој е запознаен со резултатите од разговорите во саботата.

Главната пречка на која се повикува изворот е источноукраинскиот регион Донбас. Русија го бара целиот регион, вклучувајќи ги и деловите што сè уште не ги освоила, што Украина категорично го отфрла. Русија во моментов окупира повеќе од 19 проценти од украинската територија, вклучувајќи го и анектираниот Кримски полуостров.

Според изворот, Вашингтон сугерирал дека може да му даде безбедносни гаранции на Киев, но само под услов да ги повлече своите сили од Донбас. Доколку Украина не се согласи на ова, постои можност тоа да ги принуди САД целосно да се повлечат од преговарачкиот процес. Руската инвазија на Украина почна пред повеќе од 4 години.