Адвокатите на рускиот милијардер Михаил Прохоров работат по прашањето за пренос на контролниот пакет акции на кошаркарскиот тим од NBA, Бруклин Нетс на добротворниот "Фонд за културни иницијативи " или на една од руските компании на милијардерот политичар , пишува весникот " Известија". Според познавачите , милијардерот нема намера да се лиши од тимот , но присуството на странски средства ги попречува неговите политички амбиции. Прохоров има намера да се кандидира за градската Дума на Москва , откако поради поседување на тимот не можеше да учествува во градоначалничките избори . На овој начин, Прохоров оди по стапките на сопственикот на " Анжи " Сулејман Керимов , кој исто така ги пренесе странските средства во добротворниот фонд кога влезе во политиката. На прес-службата на Прохоров потврдија дека сопственикот на " Бруклин Нетс " ќе биде сменет , но тимот не се продава и ќе продолжи да е контролиран од милијардерот . Тие сметаат дека во договорот нема ништо нелегално . Бруклин Нетс е деветтиот најскап тим во NBA и оваа година Михаил Прохоров плаќа рекорден "данок на луксуз", бидејќи платите во тимот го надминаа таванот од 71 милиони долари. Вкупните трошоци за плати на играчи и за данокот ќе бидат околу 185 милиони долари, што ќе му донесе на Прохоров загуба од околу 50 милиони долари.