Државната медиумска куќа „Русија денес“ (РТ) објави за маж кој на необичен начин се обидел да избегне делумна мобилизација.

„Еден Русин најде нов начин да избега од можна воена служба во конфликтот во Украина, сурфајќи преку реката Нарва до Естонија. Планот сепак не му успеал, бидејќи неколку часа подоцна беше уапсен и депортиран назад во Русија“, пишува РТ.

38-годишникот ја преминал границата во близина на устието на реката на стоечка штица за веслање околу еден часот по полноќ во понеделникот, го цитира RT Естонскиот јавен сервис ERR. Естонските гранични службеници во Нарва-Жоесу испратија неколку патроли, вклучително и единица за кучиња, и пронајдоа маж кој илегално влегол во земјата на автобуска станица околу 4:30 часот.

Мажот е однесен на граничниот премин за управна постапка, по што е казнет и вратен во Русија. Тој им признал на естонските власти дека ја преминал границата поради наредбата за делумна мобилизација што ја објави рускиот претседател Владимир Путин минатата недела.

Естонската влада ја засили безбедноста на границите откако Русија ја започна инвазијата на Украина во февруари. Ерик Пургел, кој раководи со граничната и миграциската контрола во естонската префектура Ида, изјави за ERR дека нема зголемување на миграцискиот притисок во земјата.

„Внимателно ја следиме ситуацијата и доколку е потребно, ќе испратиме дополнителни сили на границата“, рече тој.

Естонија престана да издава визи за руски туристи во август и им се придружи на другите балтички држави Летонија и Литванија, кои на почетокот на овој месец го ограничија влезот на руските граѓани, пренесува RT.

фото: википедија/Илустрација