Рускиот претседател Владимир Путин сака да види брз крај на конфликтот во Украина, изјави турскиот претседател Реџеп Таип Ердоган за PBS.

Ердоган рече дека одржал „обемни состаноци со Путин во Узбекистан“ за време на минатонеделниот самит на Шангајската организација за соработка (ШСО).

„Разбрав дека тие всушност се обидуваат да го завршат ова што е можно поскоро. Оваа ситуација е голем проблем“, рече турскиот лидер, мислејќи на конфликтот во Украина.

Ердоган, кој е во Њујорк на Генералното собрание на ОН, рече дека сака Путин и украинскиот претседател Володимир Зеленски директно да разговараат за да се најде решение за конфликтот, кој трае од крајот на февруари.

„Имаме постојана желба да ги собереме овие лидери. Ајде да ги собереме. Сакам да слушнам сè од нив. Сè уште не успеавме, но не сум без надеж“, рече тој. Турскиот претседател тврди дека им рекол и на Путин и на Зеленски дека е неопходен прекин на борбите бидејќи „на крајот никој нема да победи“.

Кремљ соопшти дека рускиот и украинскиот лидер треба да се сретнат само за да потпишат конкретни договори подготвени за нив од нивните преговарачи.

Нема перспектива за дипломатија?

Во моментов нема изгледи за политичко-дипломатско решение на ситуацијата во Украина, изјави портпаролот на Кремљ, Дмитриј Песков. Таквите изгледи не се видливи, изјави Песков за Интерфакс, говорејќи за можностите за решавање на ситуацијата во Украина преку политички и дипломатски средства.

Турција за време на конфликтот одржуваше контакти и со Москва и со Киев. Анкара ја осуди употребата на сила од страна на Русија, но во исто време одби да се приклучи на меѓународните санкции против Москва и продолжи да соработува со таа земја. Анкара, исто така, беше вклучена во договорот со посредство на ОН за да се дозволи извоз на жито од украинските пристаништа, што беше постигнат меѓу Русија и Украина во јули.

Русија неодамна се пожали дека дел од договорот, кој бара отстранување на пречките за испорака на нејзините прехранбени производи, не го исполниле западните земји.