Надежите дека на денешниот Самит на Г20 ќе биде соопштен договор меѓу Русија и Америка за крај на граѓанската војна во Сирија и распоредување на хуманитарна помош пропаднаа. Протоколите на двете светски сили дури имаа поставено и два подиума за Сергеј Лавров, рускиот прв дипломат и Џон Кери, државниот секретар на САД, но во последен момент прес конференцијата беше откажана бидејќи договор нема. Кери посочи дека нема да ги брзаат руските колеги и дека веќе решиле голем број на технички прашања, па затоа повторно ќе се сретне со Лавров, овој пат во Москва со цел што побрзо да се овозможи безбедна распределба на хуманитарна помош за најпогодените цивили од војната и прекин на борбите меѓу владините сили на Асад и бунтовничките паравоени движења.