Русија ги почнува подготовките за изградба на мост до Крим, објави денеска рускиот претседател Владимир Путин. Се проценува дека проектот ќе чини околу три милијарди евра, а целта е полуостровот и физички да се поврзе со руска територија, без да се преминува преку Украина. „Ни треба мост за автомобили, но и за возови“, нагласи Путин. Во моментов, единствената врска на Крим со Русија, доколку не се преминува украинска територија, е авионската или преку морскиот теснец Керч, широк 4,5 километри, преку кој поминуваат траекти. Но, возовите и натаму мора да поминуваат низ украинска територија. Рускиот министер за транспорт Максим Соколов вели дека се разгледува и варијантата да се изгради подводен тунел. Рускиот премиер Дмитриј Медведев ја потпиша одлуката за транспортно поврзување со Крим, а задачата ја довери на државната компанија БТП, која треба да го изработи проектното решение.