Руски дрон синоќа удри во станбена зграда во романскиот град Галац и експлодираше, по што претседателот Никушор Дан најави „цврст одговор“ до Русија и итно свика седница на Врховниот совет за одбрана на земјата (CSAT). 

„Свикав седница на Врховниот совет за одбрана на земјата за денеска за да разговараме за импликациите од најсериозниот инцидент што ја погоди националната територија од почетокот на агресивната војна на Руската Федерација против Украина. Ќе преземеме пропорционални мерки против Руската Федерација“, објави Дан на Фејсбук

Во истиот пост, тој вети „цврст и соодветен одговор“ на Русија. 

„Невиден настан бара цврст, координиран и соодветен одговор – на национално, сојузничко и меѓународно ниво. Со целосна решителност изјавувам дека Руската Федерација сноси целосна одговорност за овој инцидент. Она што се случи денес во Галац е директна последица на агресивната војна што Русија ја започна против Украина, неодговорниот и неселективен начин на кој Москва ги користи овие системи за оружје во непосредна близина на границите на НАТО, како и нејзиното систематско непочитување на меѓународното право. Нема сомнение за сторителите и причините за оваа агресија“, рече Никушор Дан. 

Претседателот, исто така, ги објасни постапките на романските власти откако рускиот дрон беше забележан на радарот. 

„Романските вооружени сили дејствуваа во согласност со процедурите утврдени за вакви ситуации, со цврста наредба да го соборат дронот штом условите дозволат таква операција без ризик од жртви или уништување на теренот. Откако воените радари го детектираа дронот кога влезе во националниот воздушен простор, два авиони Ф-16 на романското воздухопловство и еден хеликоптер IAR-330 SOCAT го следеа. Одлуката да не се таргетира целта беше донесена бидејќи немаше услови што би дозволиле негово уништување без зголемување на ризикот за безбедноста на цивилното население“, рече Дан. 

Тој рече дека сите сојузници на НАТО и партнери од Европската Унија се информирани за инцидентот и дека комуникацијата со сојузничките воени структури се одвива во реално време. Романија, додаде тој, официјално побара од сојузниците да распоредат дополнителни капацитети против дронови на нејзина територија со цел да се зајакне одбраната и источното крило на Алијансата. Исто така, Романија официјално ќе го информира Советот за безбедност на Обединетите нации за, како што наведе, „бруталното и повторено кршење на меѓународното право од страна на Руската Федерација“. Тој исто така изјави дека Министерството за национална одбрана, Министерството за внатрешни работи, Одделот за вонредни ситуации и Романската разузнавачка служба се мобилизирани и управуваат со последиците од инцидентот заедно со локалните власти во Галац. Покрената е целосна истрага за околностите на падот на беспилотното летало и наредени се технички стручни испитувања на фрагментите за прецизна идентификација на видот на оружјето и траекторијата. 

Дронот удри во зграда каде повреди една жена и дете.

foto Facebook/Nicușor Dan