Шпанија и Франција ги овластиле сопствениците на луксузните суперјахти „замрзнати“ согласно санкциите против руските бизнисмени да плаќаат за нивното одржување, изјавија три извори за Ројтерс.

Во Шпанија, шест јахти беа „замрзнати“  веднаш по руската инвазија на Украина во февруари, а повеќето од сопствениците ги плаќаат трошоците за одржување, екипаж, приклучување и осигурување, велат изворите на Ројтерс.

Според изворите, на поединците вообичаено им е ограничено да вршат финансиски трансакции во јурисдикции каде што се санкционирани, но шпанската и француската влада ги одобруваат плаќањата според законодавството на ЕУ и националното законодавство.

Шпанското Министерство за финансии изјави за Ројтерс дека законот од 2014 година - усвоен по руската анексија на Крим истата година - им дозволува на санкционираните лица да вршат основни плаќања за одржување на имотот.

Плаќањата доаѓаат по ветувањата на некои западни влади дека таргетирањето на луксузните средства на сојузниците на рускиот претседател Владимир Путин е централно место во нивните напори да ја казнат Москва.

Досега е продадена само една јахта, „Аксиома“  и тоа на аукција во Гибралтар во август годинава по налог на една банка

Предлозите на Соединетите Американски Држави и Европската Унија да се продадат „замрзнатите“ руски имоти и приходите да и се дадат на Украина се во застој. Во Франција и Шпанија, одлуката за замрзнување наместо запленување на луксузни средства за кои се смета дека се во сопственост на санкционирани Руси значи дека нивните тековни трошоци остануваат одговорност на сопственикот, според шпанското Министерство за финансии, француски поморски адвокат и двајца претставници на замрзнати бродови во Франција.

Џејмс Јафа, адвокат на британската фирма Jaffa & Co специјализирана за јахти, вклучително и за руски клиенти, рече дека трошоците за одржување на таквите јахти честопати биле „џебна промена“ за нивните сопственици, додека неплаќањето на такси може да им овозможи на доверителите како бродоградилиштата да побараат судовите да одобрат заплена и продажба на јахта за ликвидација на долговите.

„Изгледа дека санкциите не го имаат осакатувачкиот ефект како што беше наменет“, рече Јафа.