Откако американскиот претседател Доналд Трамп, за време на средбата со претседателот на Јужна Африка, Сирил Рамафоса, покажа фотографии и видеа за кои тврдеше дека се докази за масовни убиства на белци во таа земја, новинската агенција Ројтерс го разоткри Трамп.

Имено, за време на средбата во Белата куќа, Трамп ги држеше печатените фотографии што му ги покажа на јужноафриканскиот претседател.

„Сите овие се бели земјоделци кои се закопани во Јужна Африка“, рече Трамп.

Сепак, новинската агенција Ројтерс потврди дека фотографиите што ги покажа Трамп всушност се од видео објавено од Ројтерс на 3 февруари - но од Демократска Република Конго.

Фотографијата е направена од снимка направена од Ројтерс по смртоносните судири со бунтовниците М23 поддржани од Руанда.

Блогот што Трамп му го покажа на Рамафоса за време на состанокот беше објавен од „Американ тинкер“, конзервативно онлајн списание, и се однесуваше на конфликтот и расните тензии во Јужна Африка и Конго.

„Објавата немаше потпис на авторот, но беше наведено дека станува збор за снимка од екранот од YouTube, со линк до видео објавено од Ројтерс“, соопшти агенцијата.

Во врска со целиот случај, се огласи и видеоновинарот на Ројтерс, Џафар Ал Катанти, пренесува Klix.ba.

„На новинарите им беше исклучително тешко да влезат тој ден. Морав директно да преговарам со М23 и да се координирам со Црвениот крст за да добијам дозвола за снимање. 

Само Ројтерс го има тој материјал. Пред целиот свет, претседателот Трамп ја искористи мојата фотографија - онаа што ја направив во ДР Конго - за да се обиде да го убеди претседателот Рамафоса дека во неговата земја црнците убиваат белци“, рече Катанти.

Во друг момент од состанокот, Трамп пушти видео за кое тврдеше дека ги прикажува гробовите на повеќе од илјада бели земјоделци, обележани со бели крстови.

Сепак, снимките направени на автопатот што ги поврзува малите градови Њукасл и Нормандија во Јужна Африка всушност покажуваат споменик, а не гробови.

Роб Хотсон, кој го постави споменикот за да привлече внимание од јавноста, изјави за Би-Би-Си дека тоа не е место за погребување.

„Тоа беше споменик. Не беше траен споменик, туку привремен“, рече тој. Споменикот беше подигнат по убиството на двајца земјоделци Африканери во локалната заедница.

Фото: EPA-EFE/JIM LO SCALZO / POOL