Данската премиерка, Мете Фредериксен предупреди дека руската офанзива во Украина „најави нова ера во Европа“, најавувајќи дека земјата ќе одржи референдум на 1 јуни за да се откаже од исклучувањето од одбранбената политика на Европската Унија.

Ги повика граѓаните на Данска да го поништат исклучувањето на земјата од одбранбената политика на ЕУ на референдум што ќе се одржи на 1 јуни, по руската инвазија на Украина.

„Историските времиња бараат историски одлуки“, рече Мете Фредериксен на прес-конференција, додавајќи дека владата „многу јасно ги повикува Данците да го укинат отстапувањето од одбраната“, пишува The Guardian.

Фредериксен, исто така, вети дека ќе ги зголеми трошоците за одбрана за 7 милијарди круни (780 милиони фунти) во следните две години.Нарекувајќи ја „најголемата инвестиција во последните децении“, Фредериксен ги постави плановите за зголемување на трошоците на 2% од БДП, во согласност со барањата за членство во НАТО, до 2033 година.

Учеството во заедничката безбедносна и одбранбена политика (CSDP) ќе и овозможи на Данска да учествува во заедничките воени операции на ЕУ и да соработува за развој и стекнување на воени капацитети во рамките на ЕУ.

„За мене, како премиер, ова е одлука заснована на вредности“, рече Фредериксен.

„Бесмислениот и брутален напад на Путин врз Украина најави нова ера во Европа, нова реалност“, рече таа. „Борбата на Украина не е само на Украина. Tоа е тест на силата за сè во што веруваме: нашите вредности, демократија, човекови права, мир и слобода“.