Израелскиот премиер Бенјамин Нетанјаху денеска изјави дека Израел ќе потроши 350 милијарди шекели (110 милијарди долари) за развој на независна воена индустрија за да се намали зависноста од други земји.

„Ќе продолжиме да набавуваме основни залихи, а во исто време да се вооружуваме“, рече Нетанјаху на церемонијата по повод новите пилоти, пренесува Ројтерс.

Нетанјаху рече дека не знае дали некоја земја може да биде целосно независна, но дека Израел ќе вложи максимални напори за да се осигури дека неговите воени системи се произведуваат што е можно повеќе во земјата.

„Нашата цел е да изградиме независна воена индустрија за Државата Израел и да ја намалиме зависноста од која било страна, вклучително и од сојузниците“, рече тој.

Израел го купува поголемиот дел од своето оружје од Соединетите Американски Држави(САД). САД се главен воен сојузник на Израел и најголем снабдувач на воена опрема, технологија и финансиска помош за одбранбениот сектор.