Украинскиот претседател Володимир Зеленски повторно беше мета на неуспешен обид за атентат, а планот вклучувал полски воен пензионер кој одамна бил регрутиран од Советскиот Сојуз, објави шефот на безбедносната и разузнавачка служба на Украина.

Генерал-потполковник Васил Малјук, директор на Безбедносната служба на Украина (СБУ), даде детали за планот, кој заеднички го откри украинската СБУ и полската безбедносна агенција ABW.

Според Малјук, Русија ангажирала човек со план да го убие Зеленски на аеродромот Жешов-Јашонка во Полска, користејќи дрон со камера или снајперска пушка, објави TSN. Според РБЦ, осомничениот бил лојален на советската идеологија со години и останал лојален на неа децении подоцна. Сепак, планот бил откриен на време и осуетен, објави Newsweek, пренесе Индекс.

Откако почна руската инвазија на Украина, украинските разузнавачи спречија повеќе обиди за атентат на Зеленски.