Нафтените рафинерии во САД се во средината на една од најлошите години, пишува во својата анализа Reuters. Преплавениот пазар со нафта, ниските цени на суровините и недоволно добра летна сезона го стегнаа профитот на производителите преку океанот. Поради намалувањето на маржите многу производители одбиваат да направат многу инвестиции, го стегаат производството, се намалуваат платите и ги ослободуваат работниците.

Аналитичарите сметаат дека овој тренд ќе се задржи во текот на целата 2016 година, бидејќи нема изгледи цените на нафтата да се зголемат значително над сегашните нивоа од околу 50 долари за барел. Покрај тоа резервите продолжуваат да се зголемуваат, а кон сето ова треба да се додаде зголемувањето на уделот на ОИЕ во енергетскиот микс, воден од поевтинувањето на технологијата.

Според специјализираниот индекс на S & P 500, кој ги следи очекувањата на нафтените компании за нивните профити, до крајот на 2016 година не може да се чека ништо добро од гледна точка на финансиските резултати. Очекувањата за третиот квартал покажуваат дека просечното намалување ќе биде околу 4%.

„2016 година ќе биде година на загуби за американската нафтена индустрија“, коментира аналитичарот од Barclays Пол Ченг.

Дополнителни проблеми за секторот создаваат и новите регулативи во САД, кои ги принудуваат рафинериите или да додадат етанол до крајниот производ, или да купуваат кредити за обновлива енергија. А цената на овие кредити скокна нагло во последната година.