Украинците вработени во одржувањето на нуклеарната централа во Чернобил, велат дека руските војници, кои го зазедоа местото на злогласната нуклеарна несреќа, подигнале облаци од радиоактивна прашина кога возеле низ најзагадената област.

Војниците не носеле никаква заштитна опрема и најверојатно вдишувале радиоактивна прашина. Тоа е еднакво на самоубиство, велат работниците за Ројтерс.

„Тие тргнаа по патот покрај Црвената шума“

„Голема колона воени возила помина покрај патот веднаш зад нашиот објект, кој минува покрај Црвената шума“, изјави работник кој сакаше да остане анонимен. Црвената шума го добила своето име по експлозија во 1986 година, кога дрвјата добиле црвена боја.

„Конвојот подигна голем облак од прашина. Сензорите што ја мерат радијацијата покажаа високи нивоа на радијација“, рече тој.

По окупацијата на централата на 24 февруари, Русија соопшти дека радијацијата е во нормални нивоа и не претставува закана за здравјето на луѓето, како и дека руските сили спречиле „нуклеарни провокации од украинските националисти“ со окупирањето на електраната.

Еден од вработените изјавил дека руските војници со кои разговарал не знаеле за историјата на фабриката. „Кога ги прашаа дали знаат за катастрофата во 1986 година, експлозијата на четвртиот блок, немаа поим. Немаа поим во каков објект се наоѓаат“, рече тој.

Руските сили го напуштија градот Славутич во близина на Чернобил, градот во кој живеат повеќето вработени во централата, изјави денеска градоначалникот и привремен шеф на централата во Чернобил.

Извор: Индекс.хр

Фото: EPA/OLEG PETRASYUK