Помина помалку од еден месец откако рускиот претседател Владимир Путин потпиша нова поморска доктрина и планира да создаде поморски воени бази во Средоземното Море, Азиско-пацифичкиот регион, Индискиот Океан и Персискиот Залив за да се спротивстави на „американската закана“, а Јадранското Море стана застрашувачко толку многу што Италијанците го вклучија алармот и го проширија патролирањето на целиот медитерански басен.

Како што откри адмиралот Џузепе Каво Драгоне, началникот на Врховниот одбранбен штаб на Италија во интервју за „Ла Република“, бродовите на руската морнарица се обиделе да го блокираат излезот на американскиот носач на авиони Хари Труман од Јадранско Море, што доведе до огромно зголемување на тензиите и низа маневри на НАТО и руски бродови во таа област.

На 31 јули, Путин потпиша ажурирана верзија на Поморската доктрина на Руската Федерација, врвен стратешки плански документ кој го елаборира официјалниот пристап на Москва кон поморскиот домен. Новото издание, како што пишува „Дипломат“, открива значајни промени во однос на претходното од 2015. Според Путин, ова ново планирање има за цел „да се спротивстави на безбедносната закана што ја претставуваат Соединетите Американски Држави и нивните западни сојузници“.

Каво посочи дека во документот Медитеранот се нарекува стратешка област која ќе биде стожерот на конфликтот со НАТО алијансата и дека Русите таму постојано ќе одржуваат стабилни поморски сили.

- Тие ќе бидат особено агресивни на Блискиот Исток и Африка, каде што сакаат да создадат база во Судан. Вниманието на Русија повеќе не е само на источниот Медитеран, туку и на централниот - рече адмиралот и додаде дека ситуацијата сега е многу понапната отколку за време на Студената војна.

„Голема поморска сила“

Неговата нова поморска доктрина од 55 страници, која има за цел, меѓу другото, да ја направи Русија „голема поморска сила“, првенствено е насочена против САД и НАТО, поставува амбициозна поморска политика која вклучува клучни области како што се Арктикот и Црното Море, а исто така обезбедува силна флота и зголемување на ракетниот арсенал, според Atalayar.com.

Во својот говор на 31 јули по повод Денот на руската морнарица во Санкт Петербург, основан од Петар Велики, Путин го поздрави поранешниот цар што ја направил Русија голема поморска сила и ја зајакнал глобалната позиција на руската држава. Тој на својата морнарица вети дека во наредните месеци ќе добијат хиперсонични крстосувачки ракети „циркон“.

- Отворено ги одредуваме границите и областите на руските национални интереси, виталните стратешки области. Пред сè, тоа се водите на нашиот дел од Арктикот, Црното, Охотското и Беринговото Море, Балтичкиот и Курилскиот Проток. Ќе обезбедиме нивна цврста заштита со сите средства – рече Путин.

Индија, Иран, Ирак и Саудиска Арабија

Новата поморска доктрина споменува интереси за развој на воено-поморска соработка со Индија, Иран, Саудиска Арабија и Ирак.

Како што е наведено од Atalayar.com, Индија е многу релевантна земја поради нејзиното членство во групата БРИКС, покрај самата Русија. Саудиска Арабија е најмоќната земја на Блискиот Исток во однос на економијата и енергетските ресурси и неодамна имаше несогласувања со американската администрација поради меѓусебните разлики во однос на нивото на производство на нафта и актуелната енергетска и ценовна криза во светот.

Иран е главен политички ривал на САД во регионот, а Ирак е важна земја поради своите нафтени резерви, што е уште поизразено во актуелната криза на енергетскиот пазар обележана со последиците од војната во Украина.