Европската унија ги наполни своите складишта за гас и три месеци пред планираниот рок. Од вчера резервите на природен гас на територијата на Унијата достигнаа историски максимум, пишува Политико.

Складиштата беа пополнети многу пред почетокот на грејната сезона, што е во согласност со политиката на Брисел за ненадејното „откажување“ од рускиот гас.

Одлуката на ЕУ да ја прекине зависноста од руските енергетски извори значи и продлабочување на проблемите на Кремљ во крпењето на постојано растечките дупки во рускиот државен буџет, пренесува Јутарњи лист.

Вчера складиштата за гас во земјите членки на ЕУ достигнаа ниво на исполнетост од 90,12 отсто од вкупниот капацитет, што значи дека законската обврска е веќе исполнета, според која зафатеноста на европските складишта за гас мора да достигне ниво од 90 отсто најдоцна до ноември.

„Денешната потврда дека ги исполнивме нашите обврски пред истекот на рокот нагласува дека ЕУ е добро подготвена за зимата. Ова ќе ни помогне дополнително да го стабилизираме пазарот во наредните месеци“, рече комесарот за енергетика на Унијата, Кадри Симсон.

Учеството на рускиот гас во вкупниот увоз во ЕУ падна на 23,6 отсто во првите осум месеци од 2022 година, а оваа година уделот на Русија во европскиот увоз би паднал на само 8,4 отсто. Со ова темпо членките на Унијата можат да ја остварат целта целосно да го запрат увозот на руски гас до 2027 година.

„Ова е дефинитивно успешна приказна и за Европската комисија и за енергетскиот пазар, но пред се за владите на земјите членки, кои очигледно многу успешно реагираа на фактот дека за многу краток временски период треба да најдат замена за огромните количини на природен гас што претходно се увезуваа од Русија“, вели Џовани Сгаравати, аналитичар во тинк-тенк „Бројгел“ во Брисел.

Рускиот гас во голема мера е заменет со увоз од САД, Норвешка, Азербејџан и други земји, а цените на гасот драстично паднаа од максимумот во 2022 година.

Холандскиот индекс на цените на гасот ТТФ, кој минатата година во август достигна ниво од 320 евра за мегават-час, оваа недела се движи на ниво од околу 38 евра. Сепак, цената на гасот е сè уште повисока отколку пред војната, кога изнесуваше околу 20 евра за мегават-час – што значи повисоки сметки за домаќинствата и помала продуктивност за европската индустрија.

Аналитичарите очекуваат ова да биде последната зима во која евентуалниот недостиг на гас е сериозна грижа за купувачите, со оглед на тоа што значително поголеми количини ЛНГ од Катар и од САД треба да бидат достапни на европскиот пазар до средината на следната година.

Од друга страна, некои централноевропски земји (особено Австрија) сè уште се потпираат на рускиот гас што се испорачува преку цевководи преку Украина. Бидејќи Киев веќе јасно стави до знаење дека нема намера повторно да преговара за договорот за транзит кој истекува на крајот на следната година, тие земји сега се под голем притисок да најдат нови добавувачи на краток рок.

Губењето на европските клиенти е голем удар за Кремљ.

Руското Министерство за финансии објави дека приходите од извозот на енергија паднале за 41 отсто во првите седум месеци од оваа година. Во меѓувреме, рубљата падна на најниско ниво во последните 16 месеци.