Новите центри на моќ се зајакнуваат во Азија и таа игра голема улога во транзицијата кон мултиполарен свет, изјави рускиот претседател Владимир Путин на самитот на Конференцијата за интеракција и мерки за градење доверба во Азија (CICA) во Астана.

- Светот станува навистина мултиполарен систем. Азија, каде што се зајакнуваат новите центри на моќ, игра прилично забележлива, ако не и клучна улога во тоа - рече Путин, оценувајќи дека „азиските земји се мотори на светскиот економски раст“, ​​пренесува ТАСС.

Шефот на руската држава оцени дека асоцијациите за интеграција како Шангајската организација за соработка, Асоцијацијата на нациите од Југоисточна Азија и Евроазиската економска унија функционираат „динамично и ефикасно“ во Азија, нагласувајќи дека Русија активно учествува во сите овие процеси.

- Ние се залагаме за развој и просперитет на Азија, за создавање на широк отворен простор на заемно корисна трговска и инвестициска соработка, за проширување и продлабочување на кооперативните врски во различни сектори на економијата - пренесува агенцијата ТАСС од излагањето на рускиот претседател. 

Путин рече дека Русија, заедно со другите азиски држави, прави максимални напори „да создаде систем на еднаква и неделива безбедност заснован на универзални и признати принципи на меѓународното право и Повелбата на ОН“.

Фото: EPA/ KAZAKHSTAN'S PRESIDENT PRESS SER