Првите две тела од авионот  „Ер Азија“ кој паднал во Јаванското море се префрлени денеска во индонезискиот град Сурабаја, каде чекаат роднините на жртвите.

Авионот „ербас A320-200“ со 162 патници и членови на екипажот исчезнал од радарот во текот на летот од Сурабаја кон Сингапур во неделата на 28 декември.

 Претставник на индонезиската агенција за истрга и спасување Татанг Заенундин изјавил дека е пронајдено едно тело кое имало спасувачки елек на себе за спасување.

„Утрово пронајдовме четири тела, а едно од нив носеше елек за спасување“, рекол  Заенундин.

Досега се пронајдени вкупно седум тела, а претставниците велат дека потрагата ја отежнуваат лошите временски услови.

Операцијата на потрагата и спасувањето го предводи Индонезија, бидејќи авионот исчезнал во зона на нејзина одговорност, а им помагаат Малезија, Јужна Кореја и Сингапур.