Претседателот на Меѓународниот совет на аеродроми (ACI) во Европа, Штефан Шулте, го критикуваше системот за контрола на влез и излез на граѓани кои не се членки на ЕУ на границите на Унијата.

Станува збор за Системот за влез и излез (EES), кој Унијата го применува веќе неколку месеци, а кој вклучува контрола на патниците врз основа на биометриски податоци. Шулте им порача на политичарите од ЕУ дека треба да престанат да се преправаат дека EES функционира сосема добро.

„Патниците чекаат во редици со часови во најфреквентните периоди, а едноставно не знам како ќе се справиме со очекуваното зголемување на сообраќајот во наредните недели“, рече Шулте, кој е и раководител на компанијата Фрапорт што управува со Меѓународниот аеродром во Франкфурт.

На аеродромите во ЕУ има проблеми од воведувањето на EES. Еден таков проблем се случи во април, кога патниците на линијата Милано-Манчестер ги пропуштија своите летови поради проблеми на пасошката контрола.

Шулте верува дека е потребна целосна флексибилност за да можат граничните контроли да ја суспендираат примената на EES, кога е потребно за да се избегне хаос. Тој повика на преиспитување на споменатиот систем.

ЕУ дозволува привремено суспендирање на EES во одредени околности до септември. Сепак, Шулте потсети дека летниот шпиц трае подолго од септември и дека по тоа би можеле да се соочат со целосен колапс на системот, пренесува Би-Би-Си.

foto printskrin youtube